Cardinal Charels Mg Bo no Taigü Mang gui cu ng’ngaih u nak ah mei k’däi ah kya khai ci ne pyein ci
Msgr. Raymond Wai Lin Htun ah no Taigü Mang a kya lo nak hngüp March k’cha 19 ung Cardinal Charels Mg Bo no Taigü Mang gui cu ng’ngaih u nak ah mei k’däi ah kya ci ci ne pyein ci. Cardinal Charels no a k’tung pi ah a pyien cu mi m’lung thüi hlei ne a kya yah ung Khanpughi ah taga nak lah dimkyäp nak kä mi hngu pha lang pang ah phih a cu gui cu a k’chang gui ah khan ah ng’dang lo täng khai ci cu na m’thein gui vai ah a kya a hlo ah Taigü Mang cun phih ng’ngaih u nak ah mei k’däi ah kya ne a k’chang gui am phih a mi geinvai thüi hlei nak gui khe ne a mi ma lam ah Khanpughi ah pyantham pei gui a mi teng ne a mi hnguh hnging vai ah a k’nga phak gui vai m’cäi ci.
Tuhchü m’va kho ung diimkyäp nak kä om hleih k’chang gui ah om nak vain go kä om ba ne didam lo ca yai ca ci gui ah m’va kho k’chang gui ah phäh ah yum nak ung khäng htek ne a om vai ah Taigü Mang Msgr. Raymond Wai Lin Htun cun phih m’cä ne k’tha pe ciah kya ci. 1 cor 5:1 awn m’tung m’täng ne Taigü Mang Msgr. Raymond Wai Lin Htun am Cardinal Charles no a m’cäi cu kut awn bi ah kä kya ein ciah Khanpughi ah ghinkhaw uk ciah a kya vai ah phih m’cäi ci. A k’tung pi ah shin ah Jubilee kum ung diimkyäp nak, ät nak lah ng’ngaih u nak m’düih ne a mi lung ung phih kyai, a mi kyä hla ung phih kyai k’hma leim om ci gui a mi k’hma leim a gü ba vai ah ng’ngaih äp khai gui ah a ci peit gui vai, kä taga hkeih om ne k’chang gui m’kyüih m’kyak nak gui ung taga ne k’chü m’gein nak ng’dang khai ah bi bi vai ci ne phih m’cäi ci.
A ni ah ghinlu ung a om k’ih gui hnguh ci gui ah m’lung ng’shung hei ne mät ah ka vai bäng ng’ngaih tüh ne bi, ng’u ng’sheih nak gui ah ta phih m’hngi nak ung a mi om lo vai ah a bi hnging vai ah phih m’cäi ci. Mi mi gui cu St. Joseph ah om k’ih m’lung k’nga gui ah hlo ah mi om vai ah hlü ci. Dungdong yai ca ne a mi kho nong ghüt ne dong ci gui, coi gha ne pyam ci gui, yai ca gein vai ci gui a van ka vai ah bä ciah Joseph ah ka ning ng’hui pa k’taigü pe gui ci ci ne Cadianal Charles no pyein ci. A k’thai ah kya lo caih k’Taigü mang cu m’lung m’yo nem nak lah khäng htek ciah yum nak awn be ne a kni lam gui läk ne a düm hta ah bi bi ciah Taigü mang ah k’chang gui no a mi hmat ah kya ci.
A kyawng khui ung om ciah a nu pa noh a ni ah yum nak, ät nak gui ah tanphu cu a mi ghon peit ah kya ci. A ni cu bi than a ne bi ne Khanpughi yum nak ung khäng htek ne geitko bi bi ci ah k’kyawng khui ung ka no ng’tüi om lo ciah kya hleih a mät aun phih yum nak ung khäng htek ne k’tha na ne bi bi ciah ah k’chang tu mat ah kya ci. Cardinal no a pyein cu Msgr. Raymond Wai Lin Htun cu bä ciah Joseph vai hlü ah Boi Yesu ghung m’htei khai ah Khanpughi no a chü ah kya ci ci ne pyein ci. A ni ah bi vai cu thing ling chüikha ci gui ung Boi Yesu ghing ne om ci ci cu a ng’dnag vai ah phäh ah kya ci ci ne Cardinal Charles no pyein ci. Galatians 3:28 awn m’tung m’coih ne a pyein cu Taigü Mang cu ät nak ah Taigü mang a kya vai ci ci.
Kho mdek cu ng’tukah nak awn be ne yum nak gui lah pakkhui ng’cha nak gui awn ng’gen am nak gui om ciah kya hleih äp nak cu a kya hlü ciah kya ci. Ng’cha ng’lang nak cu Khanpughi ng’hngu ng’tuk nak, Christian gui ng’hngu ng’tuk nak lah k’chang gui ng’hngu ng’tuk nak ah kya ci. Mi mi no mi ng’hngu ng’tuk püi vai cu m’chang’lang nak lah ng’u ng’sheih nak ah va kya ci ci ne Cardinal Charles no pyein ci. Msgr. Raymond Wai Lin Htun cu m’va kho, Yangon Arch Diocese ung ka mapi bäih ne Taigü mang ah kya lo ciah Tamil Taigü Mang ah kya ci ci ne ptein ci. Cardinal no a pyein nak ung k’chang ah pakkhui gui ah ng’lak ah hlüng tai ci lah kä hlüng tai ci ah m’kho m’’cha cu Boi Yesu kalu nak awn täng ci ci ne pyein ci.
Taigü Mang a k’thai ah kya lo ciah Msgr. Raymond Wai Lin Htun no a mä ah läk lam vai ah a motto cu “ A cun ah ng’ngaih u nak awn mi mi gui cu k’pyon nak mi gah püi ci” ci ah kya ci. A ni cu Hpa-An Diocese, Hton-Bo-Quay piggo ung Christu kum 1976, September k’cha 22 ung a mi hta nak ah kya ci. Christu kum 2007, March k’cha 18 ung Taigü Boi ah kya lo ne Christu kum 2025, March k’cha 19 ung Taigü Mang ah kya lo tu ciah kya ci.
