Khòmdek Kchìng khlèi khai bi vaiKùmkyüì
Ngleimdek lah a khòtüi peìngléng mhtéimhta mòòng Papa Shangpùghang Francis no a shä ah ca ngkhäh2015 kum May 24Cardinal Charles Bo ah Mvaca kphlàn mcäìcaCá lèng neh a ngdäih ah Catholic Yùmktu Nhbum ah phàn ah tängpàng lo ci gui ah Papa Shangpùghang gui cuh catholic pahta kchàng gui ka vai bäng ah kä kya hleih khòmdek kchàng van ah ni bä nak vai yùm mhngi neh ca ngkhäh akdá gukthen teipai neh lam mshùmnak,ngngaih nakhlak,ghun mhteinak gui cuh yùm mhnginak ung ngyung neh ana akbilo vü ci gui.Christian gui no ami yùm ah Ngthukní Kyànca amòng kdäm 2 amòng k’yō 15 ung Kkhaanpùghí no Eden uyin a ngäng mhtéi vai kchàng am màmòng àp ci.Mi ngngaih düt ah cō kyang,chu dèng,mghu khai neh bi hlühlü ah bi vai,mdí mfam vai ghun-a a péit ah kä kya ci.
Cung phih tuhchü kchàng gui cuh kä ngpäng hlot ciah ng’uh ngtaknak on kchàng kdá ka vai kä tä ah ngói ka vai ah i kä ngngai neh akgù kgak ah m’ùm mkyaap neh mi yihngei ah kùmkyüì ah khòmhtūng tuinglei gui ghunmhtéi kkà ah ami mät ka vai bäng teng neh mdímdam ci gui.Khòmdek khoh-tang gui kä nüt dòòng hnging vai ah kplok neh ploh mhtah ci gui.Kä hlü kyääm ca cíngcì im gui cō khaphyit neh mei kkhú kshé gui mi mghüp ah khò kkhì ung phih kyai,a m’äm bùi òt ciah cìngcì bi khoh them gui lah tui kshe gui mi mang mi ók ah tui khmòi gui ah ghoh nong nak gui on phih kyai a m’äm mi ót ci.Khòkkhī mthéing ciah a ngling a kkhing mtàgá ciah shingghìng gui cun phih a ngyung ah lát neh chu dèng phók kplok neh hlùmmlèi òngpàn ah phäh ah a khngüüp tä a mploh mhtah ah dí shùùm neh khòtui khò k’aa a nglih a nglat nak gui cuh Myanmar Ghunkhò lah Kumkyüì nglei mah ah a kchüün kchap ah mi bùi chúm ci.
2008 ung kya ca Cyklone Nakit cuh kchàng avan ah ngdòn ah 150000 ah hngùm mchà dí shúm hlak neh kchàng avan ah ngdòn ah 800000 kpyü im kkà ah om u neh kchàng avan ah ngdòn ah 2.4 tämkäp ah ghinlù plohkheih hlak ci.Tushikum 2015 ung khòmdek ngmin neh tui a lo ah phäh ah Kalay lah Hakha mdí ci.Kchàng avan ah ngdòn ah 35 tämkäp ah lo lái vuhmhtah gui dí shùm ci.Kchàng avan ah ngdòn ah 1.7 tämkäp hlok plohkheihnak bùi ót ci gui.A khòtüi ah mvúknak kkyop neh hlò ci gui cuh dúkhaih ci gui vah akdá pí ah kya ci.A cun gui ah kya hlak ci gui cuh ami mät ka vai bäng m’ùm mkyaap ciah kcháng gui ah kya ci.Cun ah kya hleih khòmdek a khótüi peingléng mhteìmhtà vai a hlü yah ung khòmdek ah a kyòmhtang lah a phùmah gui mhtei vai kchàng gui lah kä mhteí ung bùi òt vai ah akshé kkà gui na khnguh mdáng gui ciah Papa Shangpùghang ah ngkhäh ca Laudato Si(ning mtaam u hlä)cuh mikmi kchàng van no kkhei neh läk khin ah ngkhäh ca nei ciah kaning mthämhlà gui ci.Cardinal Charles BoNghtói Ùk SayatawYankone Catholic Nghtòi Ùk Htahtana.
