Ngthu kthéing ung Proverbs gui on täng ciahKchò kkhúi shui gui.
Kchò kkhúishui gui cuh kyanca ung proverbs (နီတိဒေသနာ) gui on täng ci.Kchò pùghí pá gui no ami hta nà,phäì nà gui ami béit mcäìnak lah ni kshé mcha neh akní ah ghin om nak vai gui cuh kyanca ung mcäì gui on täng ci.Cun ah mcäì béit mtùmtäng gui cuh (A) ung ka no lèng neh (Y) ah chüt hleih a ngtääp ah mi shui ktäih hnging ah a kya ung ni kshé mcha neh ghin phyónnak vai na mcäì gui mi läk on täng khai.Tuhkbäih A on lèng ah kchò kkhúishui gui mi teng shüm ko.Kchò khúishui a ngdün
1.Ameh hngeng neh anen a mhtoh.Kchàng tumat ah ngshéi ciah mlùng on a om ih ami mtängnak ah kya ci. Buh vàinak ung avan cuh meh mtà eì hlü ci gui.Cung phih meh ah omnak kä kpha pha ung anen eì ciah ngshéi netah ameh a hnguh lah a mlùng ah yèi neh a ei cuh ngvái gui no ami mtäng nak ah kya ci. 2.A puum hngu neh a neh a läk.Ashin cun phih kä hngu ciah a ngshéi ah kya ci.Hlèi boh,hlá boh shui ci no a hnguh vai ah a khoneh shùi ci.A puum hngu ci no a khoneh a shui ba vai kä hlü ci.Cun cuh kchò mgòng pyéin lo ung amòng ktúng hmat tu génggéng netah a mòng ngpài hta gui düüt pyéin neh kä hmat ciah ngshêi ci am ami pyéinnak ah kya ci.
3.A tui khlik kä hnguh a ei kdeh kä hmat.Kchàng hei ka bäng i bo ngya hlü neh amät no u am i kä peta hlü ci am ami pyéinnak ah kya ci.Ei kdeh hta düüt phih kä mbei tu neh tui kkhing phih kä tu màn netah a ngyák hlü bäng hmat ci am ami shàinak ah kya ci. 4.A htá kyák kon ah kpúút a mghu.A htà ah pèi ah a htá kya neh a ngploh nak hnging ah kpút hngu láng neh kä bìt kä mghu kä pyaan ah om laih laih ciah kchàng tumat a htá kya neh ngploh ngkheih lo chütah tah a kpút a mghu cuh bi vai yah ung kä bi netah a ngphlän kòn ah a khòlä düüt ah bi ci cuh mtängnak ah kya ci.
5.A phäí mshuk ci lung no shu ci.Anà kcha ci khò no kcha ci.Phäí lah nà cuh lungkhò lung lah khò on ami mtäng ah kya ci.Kchàng tumat ah phäí lah nà cuh lungkhò ciah mkhá ät ah pyéin cuh lung lah khò ah khngih te tumat ah ndáng khai mtù mtängnak ah kya ci.Mät on shihlá ät ah kya ciah phäí la nà mshuk neh kchák ung lung la khó no na ploh kheih màn ci ah ami bùichún man gui on ami mtù mtäng ah kya ci.6.A uī mhtíng hleih k’am khngòng a oi.A ui kä mgu ci ci neh kchàng gui ah mà ah líng kha peng neh a kya tu yah ung a ui cuh ami k’am ung ka mgu neh eì netah dóng tu ba khai hlü a gon ung k’am kpok ngbat hleih dóng lo chütah nghtìm ci a hmai a thui man on ami mtäng ah kya ci.A htánà mgu láng hleih kä mgu ci ciah mhtim ciam ami mtängnak ah kya ci.Shin ah kchò kkhúishui gui cuh Kkhaanpùghí ah kchī mi teng ung phih mi hngu hnging ci.A ktúngpí ah Wisdom,Proverbs,Ecclesiusticus lah Ecclesiustes gui ung akdá pí ah mi hngu hnging ci.Bói mät ah Ngthu ung mä i gui on ang a täng?Mi ngah-tüh shúm ko.
