March 19 Bä ciah Joseph ah ghinlu a mong
Bä ciah Joseph cu David ah pakkhui ng’shon tu mat ah kya ci. A ni cu Nazareth maanggo hta ung om ne lethtama bi bi ciah kya ci. Caä a mi thung yo a na a om u hlä ciah shüm lä vai a mi guk nak ung Joseph cu Maria lethat khai ah yum tu ci gui a daa a om nak ung nga hleih Khanpughü no Nu Maria ngäng m’htei khai ah a ghü ah k’chang ah kya ci. A I ah kya hkeih ci ung a ni ah ng’sho htung ung om ciah hnin papai ah phäh ah kya ci ci cu om ciah kya ci. Maria cu bä ciah Joseph awn a ni om vai ah hta lak vai ng’gen nak u hleih khokum ung khämah a kya ah ng’shung hei ciah bä caih Joseph a cun hmat lo ne Maria k’chang gui ah li ah a ng’aa vai ah cun ah mong a hmat lo ung kä bä khai ci ne ng’ngai ne Maria cu düm hta ah nong ba khai ah a m’lung phupit ciah kya ci.
A cun ah a m’lung a phukpit ah mü Joseph ah a ng’mang she lo ne Khanpughü ah ng’shä Khanhtapup no a ni ah lo ne ta “David ah ng’shon Joseph, Maria na ngäng m’htei vai ah kä kyüh ein ä. Maria a kyämah cu Htitheing ciah muh Khanpughü ah a phäh ah nei kya ci.” ci ne pyein ci. Joseph cu a ih nak ung ka no ng’shüm lo ne Khanpughü ah ng’shä Khanhtapup ah m’cäi läk ne Nu Maria cu a k’ni ah ghung m’htei ne om ciah kya ci. Nu Maria cu a hta nak vai ah hngün gok lo ne kya hleih na phyon gui caih Messaiah cu hta nak ciah kya ci. Kho hngüp k’chüt be lo ne shäm vun ah vai kya lo hleih Joseph no a hta cu Jesu ci ne a ng’ming hlui ciah kya ci. A cun ung hnguh hmat k’chang gui k’thum lo u ne nayüt Boi cu m’shüm chuk lo ci gui ah kya ci.
A cun ah hnguh hmat k’chang k’thum a mi hteh ba kon ah mü ah Joseph ah a ng’mang ung Khanpughü ah Khanhtapup ng’dang lo ba ne “ Josep, let lo ne Nuaria lah nayüt Boi Yeisu khah püi ne Egypt khaw ah na dong püi goi vai. Ka ning chü lo ba güt ah chüt hleih na om vai. A I ah kya hleih ci ung Herod no a k’hmo ngon vai ne shui lo khai nei, ci ne pyein ci.” (Mateu 2: 13) a cun nung Joseph no ng’düi lo ne a hmo lah a nu cu mü k’shuung mät ah Egypt kho ah khah püi goi neta Herod a shih awng ah chüt ah om tu ci. Herod a shi awn ah Joseph cu a ng’mang she lo ba ne Khanpughü ah ng’shä no a ni am Narzareth ah a hteh ba vai ah pyein hleih Josep cun phih a hta lah a nu khah ba püi ne htei ba ciah kya ci.
Joseph cu ni ci ah shih nak awn shih vai ah na gunghtot gui ciah bä ciah k’chang ah kya ci. I kya hleih ang ci ung a ni cu Nu Maria lah Boi Yesu ah gunhtot nak awn khäng htek ciah yum nak awn dimkyäp ciah shih nak awn shih ciah kya ci. A ni cu Khanpughü ah a Nu Maria ghinlu a ni vai ah Nu Maria ah ng’la mi ah a kya ne htitheing ciah ghinlu a phäh ah a mät ah ghinlu a van gänap ciah kya hleih ng’lami k’thein gui ghung m’htei ciah bä ciah k’chang tumat ah phih kya ci. A ni ah ng’ming chü ne a ni yumäp ciah bä ciah k’chang tu mat ah phih kya ci.
