Daily Reflection – March k’cha a ghaleigoi (12) hngüp ng’yak ah ng’thu k’ni
******************************************************************************************************************************************************************************
Yonah 3: 1-10, Luka 11: 29-32
Tuhngoi ng’yak nak ung Khanpughü no Nineveh k’pakkhui k’chang gui am a mi kat nak ah phäh ah ng’yu ng’yong ba vai ah a ci peit gui ah kya ci. Tuhbäih cu Yonah no Khanpughü ah k’chü ng’ngai ne Nineve maanggo ah hteit ne khok’hngüp k’phlikip peng peng Nineve Manggo dii lo khai ne k’chü cü gui ciah kya ci. Yonah no a cü ah k’chü a cü gui cu Nineveh k’pakkhui k’chang gui no ng’ yak lo u ne a cun yum läk u ne Shanpughang ung ka no leng ne a van no a mi kat gui ah phäh ah ng’yu ng’yong ba ci gui ah kya ci. Shangpughang ung ka no leng ne a van no kä mini gui man a van ah phäh ah ng’yung’yong ba u hleih Khanpughü no ngami ah m’lung a k’cang ah a k’ni lam ah a ng’thong hlah lo hnguh lo ne Nineve maanggo cu k’dii ciah kya ci.
Tuhngoi ng’yak nak ah ng’thu ni ung khaw m’dek ah khan ah k’chang a m’shah cu a k’ni ah m’hloi ne pyein vai, m’cäi tu vai khak ci. A mi mät no a mi mät bä ne ni ci gui ah ng’ngai ci gui ah Pharisee k’chang gui cu a cun ah k’beit m’shing ne Boi Yesu ah ghumaa gui, a I phih a chüt ng’näng nak gui cu ka yum ne a I ah kä hnguh tu ci gui ah kya ci. Nga mi gui cu Boi Yesu cu Khanpughü ah hta a k’cang ah kya ci cu kä yum ci gui ah kya ne Boi Yesu no cäi vai a m’dang vai ah shang ci gui ah kya ci. Boi Yesu no a cun ah cäi vai ng’ shang lo u hleih Yonah a mong ung cäinak vai ah kon ah a I phih kä mhmuh gui vai ci ne pyein ci. A cun ah cäi nak vai cu Boi Yesu ah shih ne ta a ghün lo ba vai mong cu m’dang ciah kya ci. A cun ah cäi nak vai ah m’dang nak no Boi Yesu a ghün lo ba vai Boi Yesu a ghün lo ba shüm ba nak vai a kya ah hlo ah tuh chü kyünhloi nak yah cun phih Boi Yesu ah a ghün lo ba vai ng’ngaih u ne k’taigü ne om yah hngün ah kya ci. Kyün hloi nak (Lent) ci cu mi mi gui ah m’lung Khanpughü lam ah ng’hlat lo ba ne Boi Yesu ah yai ca nak, a shih nak lah a ghün lo nak ba ung mi ät tu vai ah kya ne mi kat gui ng’yu ng’yong ba ne Boi awn a täng ah mi ghünlu mi ghün vai yah ah kya ci.
Tuhngoi ng’yak ah ng’thu k’ni a van teng ah a kya ung k’chang ah kya ne a I ah mäih ah kat nak awn be ah kyat u lang pang hlei phih kat nak ah phäh ah ng’yu ng’yon ba ne a ni yumäp ung Khanpughü no na k’chü k’nga ne kat nak ung ka no na k’phion hleih ghinlu ung Khanpughü ung yeikyai ne om hnging vai ci cu mi ng’yak ciah kya ci.
