Servites Marmah ng’htoi m’düih ci gui ah Htitheing ciah k’chang gui
The order of the servants of Mary ciah Servites marmah ng’htoi cu Christu kum 1233 ung htitheing ciah k’chang k’chüh no Morte Senavio m’htung ung a mi m’düih ah kya ci. A cun gui ah a mi ng’ming gui cu Bonfilius, Alexis, Manettus, Amideus, Hugh, Sostene, and Buonagiunta ah kya ci gui. A cun ah k’chüih ung kä k’chumah ki k’thum, k’chumah pi ci k’hngih lah hmeipa k’hngih ah kya ci. Nu Maria m’hngi nak ung ät ci gui ah a cun ah k’chang k’chüh cu yum nak lam ung diidam ciah a mi maanggo cu k’taigü nak lah a k’ni lam bi loh nak gui awn pyamtham ba khai gui ah ni na ne ami m’lung phupit ci gui ah kya ci.
Christu kum 1233, Nu Maria Khanmopi ah a khai nak ah poi hngüp ung a cun ah htithein ciah k’chang k’chüih m k’taigü ne a düm hta ah Khanpughü awn ng’pong ne a mi om vai ah m’dang nak cu gah ci gui ah kya ci. A cun ah kya hleih nga mi gui cu a mi mät ah shämko khoh htang gui lah nguighui cu duyai k’chang gui am peitak gui ne a mi k’kyawng khui ung hlü khai gui m’cun ghüt ne ta a mi ghinlu a van gänap ci gui ah kya ci. Nami gui cu Morte Senavio m’htung ung cäicat vai aung ah läklam gui awn k’taigü ne läk ci gui ah kya ci.
Christu kum 1240 ung Taigü Maang Padingo cu ngami ah om nak ah lo ne ngami gui am a pyein cu “ Nang mi ah läklam gui cu a mät khaw m’dek k’kyawn ah ka no a mät lut lo ne pyow lo ciah ah tui pyan gui awn tang ciah kya hleih na mi ng’ngaih nak vai ci ne pyein ci. Ng’mü m’cha ah ga cu a khaw ng’däih ah a k’khang ah Khanhtapup vai hlü ah lo ci ci ne m’cäi gui ne ta Khanpughü no lam a shüm gui vai ah a mi k’taigü vai ah pyein ci. A cun kä sho pha hleih a k’hngih vei nak m’dang nak gah ba ci gui. Nu Maria no hluihlak a le k’kot ne, Khanhtapup gui cu Nu Maria ah täkphan gui ci ne ng’guk ciah ca cu yot kot ne ci cu hnguh ci gui. Nu Maria no nga mi k’chang k’chüh cu a ni ah täkphan gui ah k’chang gui ah kya khai pyein ne, htinkan a le hlui ne St. Augustine ah läk lam gui läk ne bi a mi bi vai ah m’cäi gui ci. Taigü Maang ah ng’hui nak awn ngami gui ung ka k’chuk cu Taigü Boi ah kya lo u ne, Koyin Alexis cu m’lung m’yo nem nak awn Taigü ah a kya vai dam ciah kya ci.
