Lourdes ng’lami hta Maria (1850)
Bä ciah Bernadette Soubirous cu Christu kum 1844 ung Pyinhtit khaw, Lourdes maanggo ung dudong k’kyawng khui ung ka no ng’tüi om lo ciah kya ci. Christ kum 1858, February k’cha 11 ung hngüp ung a teih püi k’hngih awn the Gave River ung shing shui khai gui ah hteit ci gui te Massabielle ku ung a mi gok lo yah ung a teihpüi gui no Bernadette cu nong ghüt u ne dong ci gui kya ci. A ten ah khaw k’chigoh ne lailäp lo hleih ku k’kyong yung pum a k’kya a k’khang lo hleih Bernadette han k’dang chüta a hloi bok ah khan ah a k’dü awn a k’khei chit ne citputti a kutu k’kot ciah a kyaa ah kyom hta ciah k’hngumi hta ah a kho kung ung hninsi papai gui om hleih hnguh ciah kya ci. Bernadette no k’tha na ne a Pa ni, a hta ni m’cu hlü hleih phih a kut cat hleih kä ci hnging ciah kya ci. Hlui bok hta hlui ciah k’hngumi hta no Bernadette cu gaih püi ne ta a ni awn a täng ah citputti a cik tu vai ah chü ciah kya ci.
Kho k’hngüp k’thum a sho lo kon ah Bernadette cu a om nak ah ku ung htei ba hleih a cun ung phih hluibok hta hlui ciah kyiom htang ciah hngumi hta cu ng’dang lo ba mä caih kya ci. Ng’lami hta Maria no Bernadette am hngüp k’chuk peng peng ng’dang ne ta kat nak daa ci gui a mi m’lung nga a thong hlah lo vai lah a cun na a ng’dang nak hti ung Taigü Boi gui no phaya kyawng a mi coh vai ah m’cäi ciah kya ci. Cun kon ah a ng’et ung om ciah long tui ung om ciah cäi cat vai ghumaa om ciah tui a awk vai ah pyein ciah kya ci. Bernadette no k’hngüp ghalei k’hma chüt hleih a cun ung hteit hleih k’chang gui a daa no läk tu u hleih phih tumat düt no phih ng’lami hta Maria ah m’dang cu kä hnguh tu ci gui ah kya ci. Bernadette no nang ng’ming a u ang ci ne ng’shi hleih, ng’lami hta Maria no kei cu kat nak kä om ein hleih ka kyämah ciah ng’la mi ah ka kya ci ci ne pyein ci. Khaw hngüp ät ung Bernadette cu Sisters of Charity marmah ng’htoi ung lut tu hleih a teihpüi marmah gui no ng’lami hta Maria no a m’dang a mong ng’shi u hlei Bernadette no a pyein cu “ kei cu Mary no m’vut gui k’kong ne m’htaih ciah paipheih vai hlü ah a na mang ah kya ci ci ne pyein ci.
