A hluläk kphlì chü ci.
Luke- 5: 1-11
A hluläk kphlì chü ci
(Mt 4:18-22; Mk 1:16-20)
1 Cun yah ung Genesareth tuilì kkàm ah a ngdüih yah ung kchààng a kdá no Bói ah mtheimcä̀i ami ngngaih, ami ngyák tu vai ah phäh ah Yèisu ami kbúi lo yah ung tuikkàm ung, nghlekko khngih om hleih hngu ci. 2 Ngákshùi gùi cu nghlekko ungka kyum lo ne ami ngvài mshi ne om ci gùi. 3 Yèisu no Simon ah nghlekko ung kài neta nghlekko cu tuikkàm ah mhläih hlak ci. Cun kòn ah nghlekko kkhaan ah ngò ne tuikkàm ah ngbuum ca kchààng gùi am mthei lo gùi ci.
4 A kchü a ngpä̀ä̀ng lo kòn ah Simon am pyéin ne “Tui a lìnák tu ba yah ah hläih neta ngvài vòi ne ngá pha vä,” ci ne pyéin ci. 5 Simon no phih “Bói o, keimi mǜ púm kthána u ne phih i kä kami pha ci. Cun ung phih Bói no a pyéin ah ngvài ka vòi khai,” ci ne mshàng ba ci. 6 A cun ah vòi u chüta ngvài ték ghepghep khai ah ngá a ng’uum pha ci gùi. 7 Nghlekko a hngei ung om ci gùi ah ami pókchààng gùi lo ne ami gung lo tu gùi vai ah väk gùi ci gùi. Ngami cun phih lo tu u ne nghlekko goi cu mdit ghepghep khai ah ngá bé hleih mchäp ci gùi.
8 Cun cu Simon Peitru no hngu neta Yèisu ah khokuung ah ngbóp ne “Bói o, kei cu kat a kdá ka bi ca kya ci. Kei aka hteit ba ä,” ci ne pyéin ci. 9 A i ah kya hleih cii ung amät lah bi tu ät te ci gùi avan cu ngá shin kchǜ ami pha lo te ah phäh ah Simon ah pó goi ah kya ca Zebèidèi ah htá goi, Yákùk lah Yohàn phih cä́i ci gùi. 10 Yèisu no Simon am mshàng ba ne “kä kyǜ èin ä.” Nang cu tuhbäih lèng ne kchààng pha ca ngvài kvòi ah na kya lo khai” ci ne pyéin ci. 11 A cu vai am ami nghlekko goi ni, om ci phùng avan tuikkàm ah nong ghüt u ne Bói läk tu ci gùi.
