February k’cha 6 hngüp ung ng’yak vai a mong (Maku 6:7-13)

7 Ghàleigoi cu chü gùi ne lèng ne khngih tä̀i, khngih ktä̀i ah tǜi gùi ne nghloh-hngóm ca khòknget gùi ami mchütnák vai ah aa pe gùi neta, 8 ngami am a pyéin lo cu “Lam nami hteih yah ungka vai ngshóhtung tumat kòn ah ngyá, mhtut, chǘkphein ung ngùi ng’it ung lèng ne a i phih kä nami hteih èinpüi vai. 9 Khophàdok lä́i cu ngleh ne khtù ngyùng goi phih kä nami ngthuh vai.” 10 Cun kòn ah ngami am a pyéin cu “A hoi phih im ung nami luh ung, kä nami hteih ba phaphùng ung, a cun ung nami om tu vai. 11 Kä ning m’ihm’om tu gùi ne nami kchü phih kä ngngài ci gùi ah a kya ung ngami ah ka hteit ba ne ami hmatnák vai ah nami khophà ungka mvutkkhùi phih nami kkhoon ghüt vai,” ci ne mcä̀i gùi ci. 12 Ngyu ba vai ah mòòng pyéin vai u ne ngami hteit ci gùi. 13 Khòknget a kdá phih ktä̀m u ne gòpyàm ci gùi a kdá cu kkhitui on hluk ne mgái ci gùi.

Boi Yeisu no a hlüläk ghaleigoi leng ne a tüih lo gui yah ung a pyein ah k’chü m’kha cu, “na mi hteih nak ah na mi ng’shäm nak vai cu ng’shohtung kon ah a i phih kä na mi htehpüi ein vai.” ci ne m’cäi gui ci. Boi Yesu no a pyeun hlü cu, a hluläk gui ah ghinlu pum ung Khanpughü ah monglam a mi thähla nak ung, Khanpughü tumat bäng yumäp ng’ngaih u ung, a i phih ci hnging khai gui ciah yum nak a k’be peit gui ah kya ci. A cun ah kya hleih, a cun ah hteithton ne Khanpughü mong lam a mi thähla nak ung Boi mät nga mi awn a täng ah om ci ci cun phih a hluläk gui no yum ci gui, hmat ci gui ah kya ci. A cun ah kya hleih a i bi ung phih, Boi ah m’cä ng’ngai ne Boi awn a täng ah bi ung kä m’chüt hnging ah bi cu kä om ci. Kä phlän hnging ah yaica buiawt nak ci cun phih kä om ciah kya ci.