Yèisu no lèng ne mtheimtháng ci.
Luke 1:1-4,4:14-21
1 Mi hngúmà ah kya pyi te ci ah mòònglam gùi, shùilèi kbuum yop ne guthén pyéinhla ci ah kchààng a kdá hngu tu gùi. 2 A khòkhtük gé ah ktàigǘ gùi lah mikhnguh gùi mät ungka kya te ci ah mòònglam gùi cu a kya te ah hlo bä̀ ah mgòng do tu néi kya ci. 3 Kamät ah kcho ah pyéin ung, a na a kya vü te ci ah mòònglam gùi cun mä, lèng ba ne ngshikcà ba gùi neta nang Theophilus no na hnguhngyák tu pyi te gùi, 4 mtheimcä̀i gùi a ngchüih ah mòòng (a kcàng ah mòòng) na hmat lo píhtí vai ah ka guthén khai ah ka ngngài pit ci néi.
Yèisu no lèng ne mtheimtháng ci.
(Mt 4:12-17; Mk 1:14-15)
14 Cun kòn ah Yèisu cu Muh Kkhaanpùghǘ ah kthágui on Galilee khò ah hteit ba ci. Ani ah mòòng cun phih a cun ah khò púm yat yop ci. 15 Ngami ah cagàt gùi ung mthei gùi hleih avan no Bói yùmmnài ci gùi.
Yèisu Nazareth ah hteit ba ci
(Mt 13:53-58; Mk 6:1-6)
16 Bói a ngvái lonák ah Nazareth ah gok lo ne amät ah ci màn ah hlo bä̀ ah kyǘn khngǘp cagàt ah lut ne mcä̀inák cu kkhei vai ne ngdǘi lo hleih 17 Bói am kcengshä̀ Isaiah ah mcä̀inák pe u hleih mcä̀inák cu kphyä́t ne a hnguh ah mcä̀icaa cu 18 “Kkhaanpùghǘ ah ngmùimchà cu ka kkhaan ah om ci. A cun no kei na hlup hleih dúdòòng ci gùi am yèi tu vai ah mòòng, mlùng ah thǜihlèi ci gùi myèi gùi vai ah mòòng, 19 kyùm ci gùi ami luh lo ba vai, mdah ci gùi no ami hnguh ba vai ah mòòng a pyéin vai, ami yokkànák gùi kphyón gùi vai, Kkhaanpùghǘ ah kchǜkhngànák, a na ngkháinák gahnák ah khòkum, khòkhngǘp, khòngshoong ung ka mthein tu gùi khai ah kei na tǜi lo ci.
20 Mcä̀inák cu kchò ba ne cagàt kngäng am pe neta ngò ci. Cagàt ung om ci gùi phùng no ani cu cǜgǘn ne teng ci gùi. 21 Yèisu no phih “Tuhngói mät shin ah mcä̀inák cu nami ngyák mät ah bé pyi ci,” ci ci.
