Hnguhmat kchààng gùi no Bói Yèisu ami khoihhngah lonák
(The Epiphany of the Lord)
Matthew- 2:1-12
Hnguhmat kchààng gùi no Bói Yèisu ami khoihhngah lonák
21 Herod shangpùghang a hang maang yah ung, Judea khò, Bethlehem ung, Yèisu a om lo tu kòn ah khngìlo lam aka lo ca hnguhmat kchààng a mshah gùi cu Jerusalem ah gok lo u ne 2 “Tuhbäih om lo tu ca Judea kchààng gùi ah shangpùghang cu hoi ang a om,” ci ne ngshi ci gùi. A i ah kya hleih cii ung keimi cu khngìlo lam ah a àihli hngu lo u neta ani shùmchuk tu vai ne kami lo ci,” ci ci gùi. 3 A cun ah mòòng cu shangpùghang Herod no ngya lo tu ne amät lah Jerusalem k’om avan ng’ä̀cä́i ci gùi. 4 Herod no ktàigǘ ktúng gùi lah kchümcä̀ikshǜm gùi kbuum gùi yop neta Khrìstù a hoi om lo tu khai ah a kya cu ngshi gùi ci. 5 Ngami no phih “Judea khò Bethlehem ah kya khai. A i ah kya hleih cii ung Kkhaanpùghǘ ah kcengshä̀ ah guknák ung shinkchà ah om ci.
6 Judea khò ah om ca nang Bethlehem,
Judea pákkhúi gùi ung,
a k’yo pí ah kä na kya ci.
Kei ah Israel kchààng gùi khòngmàng khai cu
nang ungka om lo tu khai néi,”
cii ah a om cu mthein tu ci gùi.
7 Cun kòn ah Herod no hnguhmat kchààng gùi cu düüm ah chü hlak gùi ne àihli a ngdáng lonák te ah khin ngshi gùi neta 8 “Hteit ne a khmó htá cu a ngchanglàng ah ngshi tu cang vä. Nami hnguh lo kòn ah kei phih hteit ne ani ka shùmchuk tu vai ah phäh ah na mthein lo tu ba vä” ci ne mcä̀i gùi ne Bethlehem lam ah tǜi gùi ci. 9 Ngami cu shangpùghang ah pyéin ngngài u ne ngdǘi lo ba u chüta 10 khngìlo lam ah ami hnguh te ah àihli cu ami mà ah hteit ne a khmó ah omnák ah kkhaan ah gok neta ngdǘm ci. Àihli hngu lo ba u ne a nghtéi ah yèi tu ci gùi.
11 A cun kòn ah im kkyòòng ah lut u ne a nú Maria on a kòng-ät ah a khmó cu hngu lo u ne ghùi ni, kchüt ng’ùi ni lah mirrha tui ng’ùi on khoihhngah ci gùi. 12 Cun kòn ah Herod ah kä ami hteih èin ba vai ah ami ngmang am Kkhaanpùghǘ no mcä̀i gùi hleih lam hngei ung ami khò ah hteit ba ci gùi.
