Hti-theing ca k’kyong khui kyüin k’hngüp.
The Holy Family.
Luke: 2: 41- 52.
Yèisu khmó Jerusalem khòim ah a kpoih ghüt ah mòòng.
41 Kum ktä̀i hleih Paschal ah phäh ah a núpá goi cu Jerusalem ah hteit hti màn ci goi. 42 Yèisu a khòkum ghàleigoi ah kya lo hleih Paschal thùng màn ah a núpá mah ah Jerusalem ah hang kài te ci gùi. 43 A ngpä̀ä̀ng vai am a núpá goi hteit èi ba ni hleih kpámíhtá Yèisu cu Jerusalem ung om ghüt ci. Cun ah a om ghüt cu a nú lah pá no kä hmat te ci goi. 44 Ngani no ani cu nggui ci gùi ung ngläk tu khai ah ngngài ni ne khngǘp ät lǜǜng, lam hteit cang ni neta ani pókchààng ngkhotng’et gùi ung shùi ba ci goi. 45 Kä hngu lo ba ni ne ani ani shui ba vai ah phäh ah Jerusalem ah nghlat ba ci goi.
46 Khngǘp kthùm ah kya lo hleih khòim kkyòòng ah saya ngvái gùi ah nglùng ah ngò tu ne ngngài gùi ne, amät no phih ngshi tu ba gùi hleih hngu lo ba ci goi. 47 Ani ah pyéin ngya tu ci gùi phùng no phih ani ah hnguhhmat lah a mshàng ba gùi hti ah phäh ah a nghtéi ah cä́i ci gùi. 48 Ani cu hngu lo ba ni ne a nghtéi ah cä́i tu ni neta a nú no “Ka Htá o, a i ah kya hleih keini shin ah na na ci goi ci ang. Teng ä. Na pá lah kei thǜing’ä̀ aih ne kani ning shùi ba ci,” ci hleih 49 Ani no phih “A i vai ah nani nà shùi ba te ci ang. Ka Pá ah mòònglam ka bi khai cu kä nani hmat tu ci ang” ci ne a mshàng ba, 50 Yèisu ah mshàng ba ah shin ah kchü cu a kní ah kä kshíng ci goi.
Yèisu a ngthuh ah a omnák ah khòkum gùi.
51 Cun kòn ah Yèisu cu ngani mah ah kyum lo ba ne Nazareth pìgò ah lo ba neta ani béit phùng ngngài ne om te ci. A nú no phih cun ah mòòng gùi avan cu a mlùng am k’üp dǘt màn ci. 52 Yèisu cun phih Kkhaanpùghǘ lah kchààng ah mà ah ngvái lo ne hnguhhmatnák ni, kthágui ni, Kkhaanpùghǘ ah ngkháinák gùi on bé lo leilei ci.
