Papa Shangpughang Francis no m’va kho a diimkyäp vai ah k’taigü vai ci ci.
Papa Shangpughang Francis no November k’cha (24), Mopi Khawdek Shangpughang ah poi kyün hngüp, khaw k’oi ah Angelu myeita a m’cu kon ah ung a van kyüm ne ng’hnguh ne ng’htako ne ng’ hmat ung vah diimkyäp nak a om vai ah ng’hloi tub a khai ci cu a yan gui phih a pyein man te ah hlo ah tubäih phih a cun ah pyein ba ciah kyak ci.
Papa Shangpughang no a ni awn a täng ah Angelu myeita m’cu tu khai gui ah k’äih ci gui ah khawdek pum om ciah yumtu k’chang gui am a pyein cu a mät ah khaw ung ng’gen am ng’tuk ah nak gui ah phäh ah yai ca gein vai ci gui ka vai k’taigü vai, a k’tung pi ah m’va khaw ka vai k’taigü vai ci ne a van am pyein ciah kya ci.
Christu kum 1920, November k’cha 25 cu m’va kho ah phäh ah ngoiä shümlä vai ah om ciah kyawnkahi k’hmo k’tho gui no mät no mät ah ghunkhaw gah ba ne uk hnging vai ci ne htapik a bi man gui cu shüm ba ne k’taigü vai ci ne Papa Shangpughang no a pyein ah kya ci.
Papa Shangpughang no a pyein cu Novenber k’cha 25 cu a htük pi bäih ah tekahto kyawng kai ci gui ah k’hmo k’hto gui no htapik a mi bi man ah khaw hngüp ah kya ciah (Amyohta hngüp) ah phih kya ci. A cun ah htapik cu diidam ciah m’va kho khaw ung mät ah ghunkhaw mät no gah ba vai ah ghunkhaw pum ung om ciah k’chang gui a van lam khan ah lut lo hlak man ciah kyak ci. A cun ah hlo ah diimkyäp ne Democracy a gah vai äp ne tuh güt chüt hleih k’tha na ci gui ah m’va kho k’chang gui ka mät nga ah ng’ngai ne ka k’chü m’gein gui ci. A k’tung pi ah ng’tung ah ng’tumk ah nak a däih ah a om nak ung om ci gui ah k’chang gui, a k’hmo hta gui ni, ghü ng’vai lo ki gui, dong ki gui, goipyam ci gui, k’chang k’khui lah yum nak ah phäh ah a mi yok’ka nak gui ah k’chang gui phih ka mät nga ng’ngai ne ka chünga gui ci. Tuh chü ng’tukah nak ung om ci gui ah k’chang gui a mi k’koh ah hlenget gui k’cha u ne, k’chang päng ng’cut tu ne ngoiä chüt hleih om khai ah diimkyäp nak a gah vai phäh ah ng’hnguh ne ng’htako cu a mi leng vai ka pyein hlük ci ci ne pyein ci. Cun kon ah Ukraine, Palestine, Lebanon, Sudan ghunkhaw gui ah ka vai ah phih k’taigü vai ci ah ka pyein hlü ci ci ne pyein ci.
Papa Shangpughang awn a täng ah mi ghunkhaw ah kya ciah m’va kho ka vai phih kyai, ng’tuk ah nak om ciah Ukraine, Palestine, Lebanon, Sudan ghunkhaw gui ah ka vai ah phih phi kyai shüm ba ne mi van no mi k’taigü ko.
Source: Vatican News
24 November 2024, 12:56
