Na ngäng m’htei gui ca Khanhtapup gui a mong
Na ngäng m’htei gui ca Khanhtapup gui cu huh hmat nak nga ne htitheing ca m’ca gui ah kya k’ki. Ngami bi loh cu Khanpughü a bi a mi bi vai lah k’chang gui a mi ngäng m’htei vai kya ki. a mi kyä kä om ca kya ne a ii noh phih aa awihkaih gui ah a ng’däih ah ghüng ciah m’mü m’cha gui ah kya ki. Marku ng’thu k’ni (Mk 13:25) ung k’chang tumat täi ung a ni ghung m’htei neh Khanpughü ah a ma ah k’taigü pei khai ah ngäng m’htei ciah khanhtapup tumat hti om ki ci ki. Na ngäng m’htei gui ca Khanhtapup cu mi biloh mi htehhton nak phung ung mi chü thäm hnging ung nga mi gui cu mi m’mi gui ah ng’yak hlü a hlo ah lam na m’shüm gui ne na gunghtot gui ca kya ki. Mi k’mi gui ah ng’mü m’cha a phoin vai ah a k’tung pi ah bi bi ne ta, Khanpughü ah ng’zak hlü a hlo ah Khanpughü ung ka noh mi gah ah keisu k’thagui cun phih mi k’mi gui am na thak lo gui hnging ciah phih kya ki.
St. Padre Pio noh a pyein cu Khanmopi lam ung m’ k’mü m’cha a phäh ah na ngäng m’htei gui ca Khanhtapup noh a na ngäng m’htei cu a kiaa yei tu vai kya ki. A ni cu khawnget m’chüt näng hnging ki. A ni noh a na m’hngi ah hlo ah na ghung m’htei ciah phih kya ki. Ng’tüi om lo ung tün ne shih ah chüt hleih teihpüi vai hlü phi kyai, Phäina nube vai hlü phih kyai thüi hlei yah ung m’lung na m’gei ba pe ciah ning ngäng m’htei ca khanhtpup cu a k’cum a shüm ba ne na chü hti vai ciah pyein ki.
St. Therese of Lisieux noh Boi Yesu noh a cum ah ning ngäng m’htei khai ah Khanhtapup ning pe ki. Na kho lung ung kä na vontom ein vai ah Khanhtapup noh a kut tawn ni k’phläi pe ki. Nang noh kä nguh lang pang ki hlei phih kat nak ung kä na gok ein vai lah na ng’mü m’cha a pyion vai ah teng ne bi bi ki ci ne pyien ca kya ki.
St. John Bosco noh a pyein cu nang ung na hteihpüi vai hlü, nang ning om püi ki vai hlü ah a k’cum a ning k’äih ca Khanhtapup om ci ci cu kä na k’hmih ein vai. Na yaica büiawt nak phung ung a ni na chü ung a ge ah ning gunghtot khai ah om ci. khawget gui cu nang ning ngäng m’htei ca Khanhtapup ah a mah gei ung ka noh dong yop khai gui ci ki.
St. Gemma Galgani noh goi neh a kiaa ng’ei neh Boi Yesu ah ng’ming chü neh i kya hleih shin hma ka yaikya vai nang ng’yak hlü ci ne kya hleih a ni ngäng m’htei ca Khanhtapup noh a pei ah hteit neh Boi Yesu noh shin na m’neh vai a ng’yak hlü ah a kya ung na ng’mü m’cha htitheing khai ah a ning m’shi peit a kya khai ci ne pyein ki ci ki.
St. John Vianney noh na ngäng m’htei gui ca Khanhtapup gui noh mi mi ah hngeit ah m’khukkudong neh Kotomyat Sacramentu ung om ca Khanpughü m’shümchuk ki ci cu mi hmat ung i hlok ah mi mi noh m’lung m’yo m’nem ne Missa mi khai tu vai lah mi shan gui keisu k’thagui gui cu mi gah hnging vai ah a ni am mi ng’huipa vai ci cu mi hmat vai hlü ki ci ki.
Na ngäng m’htei gui ca Khanhtapup a cum ah mi shüm ba ne mi u pa ko.
