St. John lateran Phaya kyawng a mi gänap nak poi

Roma manggo ung Phaya kyawng k’tung k’phli ah kyak ca St. John Lateran, St. Perter, St. Paul Lah St. Mary Major ci ah k’phli a om nak ung ah St. John Lateran cu capüi ma ne a mi coh ah Phaya kyawng tu mat ah kyak ki. a cun ah Phaya kyawng cu Constantine k’Shangpughang noh a peit gui ghüt ah khawm’dek ah khan ah Christu kum 313 ung a mi coh ah kyak ne a cun yah ung Lateran ng’dü im ci ah a mi chü ah kyak ki. Maapi k’bäih ne k’phoin ca Boi ah k’bum im ci ne a mi hmat man te, a k’hngu ah Yohan goi ah kyak ca k’tuik’phum Yohan lah ng’thuk’ni guk ca Yohan ah ngäng m’htei nak ung a mi gänap ah kyak ki. k’bum im mangk’kyak ung Boi Yesu ah hluläk chang ah kyak ca bä ca Petru ah a k’taigü nak man ah kyak ca shing awn a mi pyan ah mang kyak cun phih tuhchü chüt hleih üm nai nak vai ah om ca kyak ki. a cun ah Phaya kyawng k’kyiawng ah Boi Yesu ah a kyä lah a hla a mi tha nak ah phala cu bä ca Petru lah bä ca Polu a ni luk’ke pung awn a mi pyan ah kyak ki. St.John Lateran Phaya kyawng ah a hmai lam ung a mi guk ah ca cu “Roma manggo lah khawm’dek pum ung om ca k’bum im gui ah Nu lah Luk’ke” ci ah gu ne a mi tai ah kyak ki. St. John Lateran Phaya kyawng cu Papa K’Shangpughang ah om nak ah kya hleih November k’cha ung shin ah poi Yumtuk’bum no a bi ba hti cun phih Papa k’Shangpughang m’hlüng m’tai nak, a ni ah a k’chü ng’ ngaih ne om lah Papa k’Shangpughang awn ät ne om ci cu m’dang nak ah kyak ki. Antioch manggo ung ka bä ca Ignatius noh a pyein cu Papa k’Shangpughang cu m’hngi nak a van ah a k’bum ng’htoi gui cu uk ne teng ca chang tu mat ah kyak ki ci ne pyein ci.

Ref: Life of Saint written by Francis Xaverian Brothers