A m’kuleik’ko nak kyün hngüp

Cun kòn ah Zebedee ah htá goi, Yákùk lah Yohàn no a pèi ah k’et ni ne “Bói o, kei ni no kani ning shaan phùng na na péit goi vai kani ngyahlǜ ci,” ci ci goi.Yèisu no phih “A i cu ka ning ci péit goi vai nani ngyákhlǜ” ci ne ngshi goi hleih ngani no “Keini goi cu na tàimahnák ung tumat kpat täng, tumat k’eng täng ah na na ngoh hlak goi vai,” ci ne pyéin ci goi.Yèisu no phih “Nangni cu i nani shaan kä nani hmat ci. Kei ah ók vai ah myak o tu ne ka gah ah mshiinák nani gah tu hnging khai ang” ci ne ngshi goi hleih ngani no phih “Kani ci tu hnging ci,” ci ci goi. Yèisu no “Ka ók vai ah myak cu nani o khai. Ka gah vai ah mshiinák phih nani gah khai. Ka k’eng kpat ah ngoh vai lä́i cu pyaan péit gùi kah vai ah kòn ah a u am phih kä ka pe hnging ci,” ci ne pyéin ci. Ghà no ngya u ne Yákùk lah Yohàn cu kä yèina goi ci gùi.Yèisu no chü gùi ne a pyéin cu “Kchààng gùi ung shangpùghang gùi no kkàluna khmà ci gùi ah mòòng, ami shangpùghang gùi no ami kkhaan ah aa bi ci gùi cu nami hmat ci.Nangmi gùi lä́i ung cun ah kä a kya vai. A ngvái ah kya hlǜ ci cu nami bi ning biipe gùi ci ah nami phàn ah a kya vai.Nangmi gùi ung mà hlǜ ci cu kchààng avan ah phàn ah a kya vai.A i ah kya hleih cii ung kchààng ah htá mät cu a ngphàn vai ah phäh ah kä kya ci. Ami phàn vai ah lah kchààng a kdá ah phyónnák vai ah phäh ah amät ah hngùùn a péit vai ah lo ci.”