Avila Manggo ung ka Bä ca Theresa ah ghinglu a mong

Bä ca Theresa cu Carmelite Marmah ng’htoi m’düih ca bä ca k’chang tu mat ah kya ki. A ni cu Christu kum (1515), March k’cha (28) ung Spain Ghunkhaw Avila maanggo ung a mi hta nak ah kya ki. A k’hmo yah ge ung tün ne a khaw ng’däih ah khäng thek ca yum nak awn Khanpughü am a ghinlu gänap hlü ca kya ki. A kho kum ghaleigoi, a nu a shih yah ung Nu Maria ah a gup ah hteit ne tuh bäih ung tün ne Nu Maria cu kei ah nu a kya hlä ci ne kyap ne k’taigü ca kya ki. A khaw kum (20) ung Avilla Maanggo ung om ca marmah ng’htoi ung lut tu ki. A luh nak tu ah marmah ng’htoi ung om ci gui cu Khanpughü lam ah a mi ghinlu a k’ni ah kä gänap ci gui ci ah a hngu gui cu a ani ah phäh ah cäicat nak vai kya ki. Ngami ah hteit ne om tu ca k’chang gui awn yeikiai ng’htak’ko ne a mi k’taigü vai lah Khanpughi a mi ng’hta ng’ko shüm hmat vai kä tä ne om ci gui. A dapi cun phih k’tha ne a i kä bi hlü u ne ei düt ci gui ah kya ki. Cun tu pang ngaphih bä ca Theresa cu Khanpughü ah chü thäm nak hmat ne a cun nung m’hteng ne a k’ni ah gänap ne om ghning ca kya ki. Yumtuk’bum ah a ng’vai gui noh kä yum tu bang lang hlei phih Christu kum phya ghaleik’hma lah k’chukipleiät (1561) ung Avila Manggo ung Marmah ng’htoi m’düih ca kya ki. A cun ah marmah ng’htoi ung om tu ki gui cu m’hteng ca läklam vai gui a k’ni ah läk ne a cum ah diimkyäp ca ghinlu awn gänap ci gui ah kya ki. Nga mi gui ah ng’phep guih ne du nak lah kiünhloi ne a mi om cu ng’hmat khai ah a mi khawdok gui cu gui awn a mi pyan düt ng’leh ne om ci gui ah kya ki. Bä ca Theresa cu  ng’mü m’cha lam ung thuuk ca k’cä gui yum ca kia hleih a caguk a k’daa pi ung hngip hngäi ca m’thei m’thang gui guk ca kia k’ki.

Bä ca Theresa cu Christu kum phya ghaleik’hma lah chüütkipleigoi (1582), October (4) ung shik ca kya ki. A ni cu a mi lu k’ke m’hneh ki gui, kä gai ki gui ngüng m’htei ca bä ca k’chang ah kya ki.

Reference: Life of Saints (Written by Seminarians (Pyin Oo Lwin)