Bä ca Francis Asisi (htitheing ca chang)
Boiphaya ah kya lo tu k’khai gui ca a mi ng’thei nak a kiawng m’düih ghüt ca bä ca Francis Asisi cu Christu kum phya ghaleiät lah chüütkipleigoi (1182) ung Itali Ghunkhaw, Asisi Manggio ung ng’tüi ki. Ng’büh ng’mang ciah kyawng khui ung ah kya hleih a k’hmo ah a ghinlu cu kyä lam yeikyai nak gui ah huu düt ung läk ne kya man te ki. A khokum m’kulei m’hma ung St. Damian ng’bum im ung a k’taigü yah ung Boi Yesu no shing ng’kang k’tung ung ka noh a pyein cu “ Francis aw nang noh na hnguh ah diidam ca yum tu k’bum hteit ne pyang tham ba ä’ ci ne pyein ca kya ki. a cun kon ah Francis cu dudong yaica ki gui am hluihlak lah ngui a peta ne ng’bum im hta tumat leng ne co ca kya ki. A pa noh a cun hmat lo ne a kyaa m’lung k’she ne ta Francis noh a shäm ko gui a van shang ba hleih Francis noh Taigü maang ah im hmai ah a hluihlak gui a van hlut ne ta shin ah hlui hlak gui cu nang pa noh na shäm ko ah khohtang ah kya ki ci ne pyein ci. Nang pa am kei noh khom’dek ah khan na pa ci ne ka ning chü te tuh bäih läi khanmopi ah om ca ka Pa am Pa ci ne ka chü khai ci ne a pa am pyein ci. A khawdok kä ng’leh ein ne ng’phyüt ne htek ca a hlui k’she hlui ne, k’taigü nak lah ng’phep nak awn tün ne a ghünlu a k’thai ah leng ba ca kya ki.
Francis cu Deacon a kya kon na k’khei ne kä m’chüt hnging vai ah bi a kiaa bi hnging ca kya ki. A ni cu a läk lam a kya ciah ng’phet guih ne du nak lah m’hni nak cu k’chang gui a mi thei lo tu hnging vai ah m’dang ne yumtu ng’bum cu pyaing tham ba ciah kya ki. A ni cu Khanpughü ah tüi pyan gui ah khan nah a m’hngi yei nak m’dang ca phäi hta khaw k’hngi lah pai hta k’cha ciah Christian ng’äi gu ne ng’äi ca kya ki. A ni noh Kanpughü a mong lam thähla ki gui ah Taigü Boi gui am a pyein ghüt cu “ kei ah bi loh gui a van ng’päng yop ci. Nang mi noh na mi bi vai gui Boi Yesu noh ning m’thei gui hlä” ci ne pyein ghüt ci. Bä ca Francis cu Christu kum Phya ghaleigoi lah m’kuleik’chuk (1226), a khokum phlikipleiphli ung shi ciah kya ki. A ni cu pyukkha khihla gui Khanpughü ah tüi pyan gui a kiaa m’hngi ne yei na hleih a cun gui ghung m’htei ca Bä ca k’chang ah kya ki.
Reference: Life of Saints (Written by Seminarians (Pyin Oo Lwin)
