Na ngäng m’htei gui ca Khanhtapup gui a mong
Na ngäng m’htei gui ca Khanhtapup gui cu huh hmat nak nga ne htitheing ca m’ca gui ah kia k’ki. Ngami tarvon cu Khanpughü a bi a mi bi vai lah cahng gui a mi ngäng m’htei vai kia k’ki. a mi kiä kä om ca kia ne a ii noh phih aa awihkaih gui a a däih ah ghüng ca m’mü m’cha gui ah kia k’ki. Marku ng’thu k’ni (Mk 13:25) ung chang tumat täi ung a ni ghung m’htei neh Khanpughi ah a ma yah k’taigü pei khai ah ngäng m’htei ca khanhtapup tumat hti om ki ci k’ki. Na ngäng m’htei gui ca Khanhtapup cu mi bi loh mi hteih htawn nak phung ung mi chü thäm hnging ung nga mi gui cu mi m’mi gui ah ng’yak hlü a hlo ah lam na m’shüm gui ne na gunghtot gui ca kia k’ki. Mi k’mi gui ah ng’mü m’cha a phoin vai a k’tung pi ah bi bi ne ta, Khanpughü ah ng’zak hlü a hlo ah Khanpughi ung ka noh mi gah a keisu k’thagui cun phih mi k’mi gui am na thak lo gui hning ca phih kia ki.
St. Padre Pio noh a pyein cu Khanmopi lam ung m’ k’mü m’cha a phäh ah na ngäng m’htei gui ca Khanhtapup noh a na ngäng m’htei cu a kiaa yei tu vai kia k’ki. A ni cu khawnget m’chüt näng hnging ki. A ni noh a na m’hngi ah hlo ah na ghung htei ca phih kia k’ki. Ng’tüi om lo ung tün ne shi a chüt hleih teihpüi vai hlü phi kiai, Phäina nube vai hlü phih kiai thüi hlei yah ung m’lung na m’gei ba pe ca ning ngäng m’htei ca khanhtpup cu a k’cum a shüm ba ne na chü hti vai ci k’ki.
St. Therese of Lisieux noh Boi Yesu noh a cum ah ning ngäng m’htei khai ah Khanhtapup ning pe k’ki. Na kho lung ung kä na vontom ein vai ah Khanhtapup noh a kut tawn ni k’phläi pe k’ki. Nang noh kä nguh lang pang ki hlei phih kat nak ung kä na gok ein vai lah na ng’mü m’cha a pyion vai ah teng ne bi bik’ki ci ne pyien ca kia k’ki.
St. John Bosco noh a pyein cu nang ung na hteihpüi vai hlü, nang ning om püi ki vai hlü ah a k’cum a ning k’äih ca Khanhtapup om ci ci cu kä na k’hmih ein vai. Na yaica büiawt nak phung ung a ni na chü ung a ge ah ning gunghtot khai ah om ci. khawget gui cu nang ning ngäng m’htei ca Khanhtapup ah a mah gei ung ka noh dong yop khai gui cik’ki.
St. Gemma Galgani noh goi neh a kiaa ng’ei neh Boiyesu ah ng’ming chü neh i kia hleih shin k’hma ka yaikya vai nang ng’yak hlü ci ne kia hleih a ni ngäng m’htei ca Khanhtapup noh a pei ah hteit neh Boiyesu noh shin na m’neh vai a ng’yak hlü ah a kia ung na ng’mü m’cha htitheing khai ah a ning m’shi peit a kia khai ci ne pyein ki cik’ki.
St. John Vianney noh na ngäng m’htei gui ca Khanhtapup gui noh mi k’mi ah hngeit ah m’khukkudong neh Kotomyat Sacramentu ung om ca Khanpughü m’shümchuk ki ci cu mi hmat ung i hlok ah mi k’mi noh k’lung m’zo m’nem ne Misa mi khai tu vai lah mi shan gui keisu thagui gui cu mi gah hnging vai ah a ni am mi ng’huipa vai ci cu mi hmat vai hlü ki ci k’ki.
Na ngäng m’htei gui ca Khanhtapup a cum ah mi shüm ba ne mi u pa ko.
