Lisieux Manggio ung ka bä ca Theresa a mong
Bä ca Theresa cu Christu kum pyaghaleik’chäit lah chüihkipleik’thum (1873), January k’cha (2) ung Pyinhtit khaw Alancon manggio ung ng’tüi om tu ca kia k’ki. A ni cu Martin ah k’kiawngkhui ung a k’shui hta pi a kia k’ki. A mi hta nak ge ung keng ee neh kä gai hleih ghüng neh om tu khai zah aa mi ng’ngaih man te. A hmo hta zah gei ung tün neh kä ei ok hnging hleih a k’tha maih lo lei lei neh zai man ca kia k’ki. Theresa a nu cu a k’hmo hta yah gei ung Nu Maria a kiaa ah ng’ngaih u neh om man ci. A nu a hlo ah Theresa cun phih chang hei gui awn kä täng ein hleih Nu Maria gn’ngaih u neh Khanpughü yum äp ne om ci ah kia hleih a kiaa a goi zah ung Numaria noh a gaih pui hleih gai ba man ca kia k’ki.
A ni Khanpughü noh a chü thäm nak cu Christukum pyaghaleik’ghüit lah chüitkipleik’chuk, Christmas poi ah a yanmü ung Nazüt Boi ah hngiphngäi ne thuk ki ci cu k’cä nak ung ka noh tün lo ca kia k’ki. Christu kum Pyaghaleik’chüit lah chüitkipleik’chüit (1888) a khaokum ghaleik’hma ung ( Papal dispensation) ci ah Papa Shangpughang ah Marmah kiawng a luh tu vai a k’bäi nak awn Lisieux om ca carmalite kiawng ung lut tu ki. Bä ca Theresa ah a k’cum ah a zumläk lä vai ah k’chü m’kha cu “ Ka m’hngi nak awn va ka peita ba hnging ki” ci ah kia k’ki. Marmah kiawng a om tu zah ung Theresa a läk lam gui cu a lang hta gui düt a va kia ki. a hngüp täih hleih a bi hta gui a kia k’ca phaipheih a pheik hta gui düt lah a hteihpüi pok’chang gui, a hmat thei nak gui ung chang hei gui awn kä täng ein ca m’hngi nak awn a i phih bi ne a bi phung Khanpughü am gänap ca kia k’ki. A khaw ng’däih ah a kiä kä gai ne kia tu lang bang hlei phih Khanpughü ah ng’ thuk’ni a m’lung kiawng ah kep cheng geng neh a zaica büiawt nak gui awn Khanpughü a zum nak khäng htek lo pihti khai ah günap ca kia k’ki.
Marmah ah kia lo tu k’khai gui (Aspirents) a teng vai yah tavon pei u hleih a naa k’hhmo gui m’lung m’zonem nak lah htitheing nak awn a mi om hnging vai ah a m’gong awn m’thei m’thang gui neh,a omk’ih awn phih a k’ni hta a m’dang gui ne chü khawng gui ca kiak’ki. A ni noh a guk ghüt ah “ Ng’mü m’cha hlu ah läk lam vai kia k’kia ca ( The Story of a soul) ci ah m’mü m’cha lam ung ghinlu ci ah a guk na ung “ kei cu Khanpughü ah ma ah i ah kä mong ne ka bi loh a zo hta gui dät awn ka gänap tu hnging ca i ah kä mong ki ah m’mü m’cha hta ka kia k’ki” ci ne guk ca kia k’ki. Khanpughü lam ung a hngun pei hlük’aih ki kiah hleih a k’taigü nak awn m’müm’cha gui k’phyion neh khanpughü ah ghunkhaw a ng’shong vai ci ne gänap ca kiak’ki. A ni ah gänap nak cu Khanpughü ah ng’shung hngei nak vai kä kia ne Khanpughü ah a m’hngi nak ka phäh ah ka gänap ah kia k’ki ci k’ki.
Theresa kä shih pha ung a pyien ghüt cu “ka ghünlu pum ung a däih ah Khanpughü yumäp ne m’hngi nak ung ka om ci. Thitheing nak ci cu “mät a m’lung kiawng ung ka noh m’lung m’yom’nem ne mät noh mät ah k’tha nem nak hmat ne k’chü m’gen nak awn be ca Khanpughü yumäp ung htitheing nak gah vai” ci k’ki. Theresa cu Christu kum Pyaghaleik’chüit lah k’kokipleik’chüih (1897) September k’cha thumkip (30), a khawkum m’kuleipli (24), ung Khanpughü ah bi abi nak marmah a kia nak khawkum k’ko (9) a be lo yah ung Pyinhtit khaw ah shi k’ki. A cun kon ah Christu kum Pyaghalei k’ko lah m’kuleik’hma (1925)ung a ghaleiät nak Papa Shangpughang Pius a uk za hung Khanpughü ah mong lam bi ki gui m’htei gui ca bä ca chang tu mat ah kia lo k’ki.
Mi k’mi gui phi bä ca Theresa ah hlo ah mi m’lung m’zo m’nem ne mi bi hnging awn Khanpughü mi gänap tu hnging vai ah mi k’tha na ko.
