A m’ku-lei-goi nak kyün k’hngüp

Pharisee gùi ah thung man  

Pharisee gùi lah Jerusalem-a kah lo ci gùi-ah k’chü m’cäi süm gùi a m’sah gùi cuh, a mà-ah ng’bum lo u neh,  a-hlu-läk a m’sah nawh leloi ci-ah kut, kä m’si ah èi èi u hleih hnguh-u neh piéin gùi ci gùi.  A i-ah kia hleih ci ung Pharisee gùi ni, Judaeu gùi van nawh cáü pughi-pá gùi ah ci man cuh, läk u neh kut kä m’si ah èi kä eì man ci gùi.  Zoih-tuknák-a kah ami lo bà ung phih, tui kä ng’si neh èi kä eì man ci gùi. Cun kon-ah, ùm, am, dawn, k’phia m’si k’piò ung leng neh a hei a k’dá, ci man gùi ami läk vai om ci.  Cun-ah kia hleih Pharisee gùi lah k’chü m’cäi süm gùi nawh “A i-ah kia hleih na k’chàng gùi nawh cáü k’chàng ng’vái gùi-ah ci man-ah kä läk u neh kä théing ci-ah kut awn èi eì ci gùi ang?” ci neh  ng’si ci gùi.  Báwi nawh m’sàng bà gùi neh a piéin bà cuh, “Sin-ah k’chàng gùi nawh kei cuh, ami m’gong düit-awn na zèinák ci gùi. Ami m’lung läí cuh, kei awn a ng’htèi ah hla k’ci,” ci-ah, Isaiah nawh nangmi k’chàng-ah ng’séi-gùi -ah màwng cuh, ng’büh htá k’hläm khai-ah, ce ng’sä m’gong awn piéin ci.

Ngami nawh kei ami na sum-chuk cuh, a khaw-ghong ah kia ci. A i-ah kia hleih ci ung, ngami nawh k’chàng-a bi-loh hloi hlak gùi cuh, Khãnpùghí-a bi-loh vai hlü ah m’thei m’thang ci gùi.

 A i ah kia hleih ci ung, Khãnpùghí-ah m’thei m’cäi gùi nòng èin neh k’chàng nawh a pian-ah m’thei m’cäi bi-loh hloi hlak gùi cuh, nami ng’bah-nák chêng geng ci.        Cun kon-ah ngami àm a piéin cuh, “Nami ci man gùi cuh, nami läk vai-a phäh-ah Khãnpùghí-ah m’thei m’cäi cuh, m’hloi thei neh nami ghot ci.  A i-ah kia hleih ci ung, Moses nawh a piéin cuh, “Na Pá lah na Nú na m’htéi vai. Cun kon-ah a nú pa plah ci cuh, ngáwn vai,” ci ci.  Nangmi läí nawh “pá-àm boh, nú-àm boh, ka ning péit-tak tu vai hlü te ah khawh tang cuh, Corban ah kia pi ci (Khãnpùghí am ap pi) a ci ung  Cun-ah k’chàng nawh a nu pa kavai a-i a ci bà vai kä hlü ci,” nami ci ci. Nami-läk man gùi awn Khãnpùghí ah k’chü cuh, nami nòng ci. A cun-a hlo a k’dá cun phih, nami bi ci.

Cun kon-ah, k’chàng ng’bum gùi cuh, chü bà gùi neh ngami àm a piéin cuh, “Nami om ci phung nawh na ng’ngài neh hmat vä. K’Chàng-ah k’pung-a kah, a’kiong-ah lut neh k’chàng séit kat hlak khai kä om ci. k’Chàng-ung-kah lut lo ci bäng nawh vah k’chàng séit kat hlak ci. A ng’záknák vai a k’hngà om ci nawh ng’za hlä.”