Bä ca Rose ah ghinlu
Bä ca Rose cu America htun khaw ung maapi neh bä ca chang a kia lo ki. A ni cu Christu kum pyaghaleikhma lah chüikipleikchuk ung Peru ghunkhaw Lima manggo ung ng’tüi om lo ca kia ki. A nupa noh a ni cu a ceimah vai ah a ng’zak hlü cu dam neh ng’phep guih ne du nak la neh a ni zum m’hngi tu ki gui noh a mi nong vai a phäh ah a ni ah kiom hta ca a hmai ni, a khut ni cu ng’htei shiing awn hluk hti ca kia k’ki. A khawkum m’kuu ung St. Dominic marmah kiawng ung lut tu neh a cunung ka noh leng neh a mät pyiü hta tumat ung kiünhloi neh om ca kia ki. A ni ung khawnget a tawktap nak gui a k’daa om tu panglang hlei phih a zum nak ng’zung na neh, a m’lung ng’shäi khai ah pyiangtham neh tawktap nak gui a van a plän hngning vai ah k’thaa nak ca kia k’ki. Khaw k’hnüp ät ung khanpughi noh a ni am a pyien lo cu “ a kiaa ah thüihlei zaicaa nak a päng ung keisu lo k’ki. Thüihlei zaicaa nak kä om hleih a u phih khanmopi ah a gok vai ah lam kä hnuhnging khai” ci neh pyien lo hleih a cun a ng’zak konna bä ca Rose cu a m’lungcha lam ung k’thagui gah lo ca kia k’ki. A ni aa shih pha ung a taigü cu “Khanpugi aw kei a zaicaa nak gui na m’uum peit ä. A cunnah zaicaa nak awn nang Boi ah m’hnginak kei ah m’lung ung däm lo hlak ä.” ci ne shang ki. A ni cu Christu kum pyaagaleichuk, a khawkum thumkipleiät ung khanpughi noh a chü ba a kia k’ki.
Mik’mi gui phih bä ca Rose a hlo ah mi thüihlei zaicaa nak ung khanpughi a kyesu om ci ci cu mi zum neh a cunna thüihlei zaicaa nak gui phung m’chüt näng neh khanpughi ung mi m’yumnak a khänghtek lo pihti vai Keisu thagui mi shang ko.
